გარდაბნის მუნიციპალიტეტის მერიის ორგანიზებით, ქალაქის №1 საჯარო სკოლის სპორტულ დარბაზში ფრენბურთის ყოველწლიური ჩემპიონატი ჩატარდა.

სპორტული ღონისძიება საქართველოს ტერიტორიული მთლიანობისათვის 2008 წლის რუსეთ-საქართველოს ომში დაღუპული მებრძოლის, ლევან დევდარიანის ხსოვნას მიეძღვნა და წელს უკვე მეათედ მოეწყო.

თამაშები ფრენბურთის საერთაშორისო ფედერაციის (FIVB) მოქმედი წესების შესაბამისად წარიმართა და ტურნირი „თელავის” გამარჯვებით დასრულდა.

მეორე ადგილი „სამტრედიამ“ დაიკავა, ხოლო მესამე ადგილზე „გარდაბანი“ გავიდა.

საპრიზო ადგილებზე გასულ სპორტსმენებს შესაბამისი ხარისხის მედლები, სიგელები და თასები, ლევან დევდარიანის მშობლებთან ერთად, გარდაბნის მუნიციპალიტეტის მერმა დავით კარგარეთელმა, მერის მოადგილემ ფუად მირზოევმა, საკრებულოს თავმჯდომარემ მიხეილ გედეხაურმა და საკრებულოს წევრმა ზურაბ ბენდელიანმა გადასცეს.