1. პროგრამით მოსარგებლე

პროგრამით მოსარგებლეები არიან გარდაბნის მუნიციპალიტეტში რეგისტრირებული საოპერაციო, სამკურნალო და სხვა სამედიცინო მომსახურების დაფინანსების საჭიროების მქონე სოციალურად დაუცველი პირები და „ბავშვის უფლებების დაცვისა და მხარდაჭერის პროგრამის“ ბენეფიციარები, რომელთა ოჯახის სარეიტინგო ქულა არ აღემატება 150 000-ს.

2. პროგრამით მოსარგებლეთა დაფინანსების ზოგადი წესი და პროცედურები

• პროგრამის ფარგლებში სამედიცინო დაფინანსების მისაღებად ბენეფიციარი წერილობითი განცხადებით მიმართავს და სრულყოფილ დოკუმენტაციას წარუდგენს გარდაბნის მუნიციპალიტეტის მერს (შემდეგში „მერი“) ან გარდაბნის მუნიციპალიტეტის შესაბამის ადმინისტრაციულ ერთეულში მერის წარმომადგენელს (შემდეგში „მერის წარმომადგენელი“). მიღებული დოკუმენტაცია შესასწავლად იგზავნება მერიის ჯანმრთელობის, სოციალური, ბავშვის უფლებების დაცვისა და მხარდაჭერის სამსახურში (შემდეგში „სამსახური“). „ბავშვის უფლებების დაცვისა და მხარდაჭერის პროგრამის“ ბენეფიციარის შემთხვევაში, სამსახურს წერილობით მიმართავს გარდაბნის მუნიციპალიტეტის მერიის ჯანმრთელობის, სოციალური, ბავშვის უფლებების დაცვისა და მხარდაჭერის სამსახურის ბავშვის უფლებების დაცვისა და მხარდაჭერის განყოფილება (შემდეგში „ბავშვის უფლებების დაცვისა და მხარდაჭერის განყოფილება“).
• პროგრამა ითვალისწინებს წელიწადში ერთხელ (ოჯახის მდგომარეობის გათვალისწინებით შესაძლებელია ორჯერ) საოპერაციო, სამკურნალო და სხვა სამედიცინო მომსახურების დაფინანსებას (გარდა სტომატოლოგიური მომსახურებისა, ესთეტიკური ქირურგიისა, კოსმეტიკური მიზნით ჩატარებული მკურნალობისა, ლაზერული კორექციისა, არჩეული ექიმის ჰონორარისა (მათ შორის, დავალიანების არსებობის შემთხვევაში) და მოქალაქის მიერ საყოველთაო ჯანდაცვის სახელმწიფო პროგრამით მომსახურებაზე უარის თქმის შემთხვევისა), თუ:
  • • მომსახურება არ ფინანსდება კერძო დაზღვევის ან/და საყოველთაო ჯანდაცვის ან/და სხვა სახელმწიფო პროგრამის ფარგლებში, დაფინანსება მუნიციპალიტეტის მხრიდან განისაზღვრება:
      • ბენეფიციარის მიერ გადასახდელი თანხის 100%-ით (1000 დან -70 000 ქულის ჩათვლით);
      • ბენეფიციარის მიერ გადასახდელი თანხის 80%-ით (70 001 დან -150 000 ქულის ჩათვლით);
    • მომსახურება ნაწილობრივ ფინანსდება კერძო დაზღვევის ან/და საყოველთაო ჯანდაცვის ან/და სხვა სახელმწიფო პროგრამის ფარგლებში, თანადაფინანსება მუნიციპალიტეტის მხრიდან განისაზღვრება:
      • ბენეფიციარის მიერ გადასახდელი თანხის 100%-ით (1000 დან -70 000 ქულის ჩათვლით);
      • ბენეფიციარის მიერ გადასახდელი თანხის 50%-ით (70 001 დან -150 000 ქულის ჩათვლით).
    • მომსახურება ფინანსდება:
      • არაუმეტეს 2500 (ორი ათას ხუთასი) ლარისა;
      • მედიკამენტების შეძენის შემთხვევაში – არაუმეტეს 600 (ექვსასი) ლარისა და შშმ პირის შემთხვევაში არაუმეტეს 1000 (ათასი) ლარისა;
      • რეაბილიტაციის შემთხვევაში – არაუმეტეს 1000 (ათასი) ლარისა და შეზღუდული შესაძლებლობის მქონე პირის შემთხვევაში არაუმეტეს 1500 (ათას ხუთასი) ლარისა;
      • თვალის ინექციის შემთხვევაში – არაუმეტეს 1000 (ათასი) ლარისა.
    • მერიის მიერ გაცემული ადმინისტრაციული დაპირება ძალაშია, თუ მის საფუძველზე მომსახურების გაწევა დაიწყება მისი გაცემიდან 30 (ოცდაათი) კალენდარული დღის ვადაში. ადმინისტრაციული დაპირების ვადის გაგრძელება (გამოუყენებლობის შემთხვევაში) შესაძლებელია ერთჯერადად, 30 (ოცდაათი) კალენდარული დღით. ადმინისტრაციული დაპირების გაცემამდე ჩატარებულ მომსახურებაზე მერია არ იღებს ფინანსურ ვალდებულებას.
    • სამედიცინო დაწესებულების მიერ ადმინისტრაციული დაპირების საფუძველზე შესრულებული სამუშაოს დამადასტურებელი დოკუმენტის მერიაში დაფინანსების მოთხოვნით წარდგენის ვადაა პაციენტის გაწერიდან/კვლევის დასრულებიდან 30 (ოცდაათი) კალენდარული დღე. ფარმაცევტული კომპანიის მიერ მიღება-ჩაბარების აქტის მერიაში დაფინანსების მოთხოვნით წარდგენის ვადაა მედიკამენტების გაცემიდან 30 (ოცდაათი) კალენდარული დღე.

3. დახმარების მისაღებად მერიაში წარსადგენი დოკუმენტები

• განცხადება;
• განმცხადებლის ან/და პაციენტის პირადობის/დაბადების მოწმობის ასლი;
• იძულებით გადაადგილებული პირის/დევნილის მოწმობის ასლი (იძულებით გადაადგილებული პირის/დევნილის მომართვის შემთხვევაში);
• ცნობა, სადაც მითითებული იქნება, რომ ისინი არ არიან ამ წესით გათვალისწინებული ანალოგიური დახმარების მიმღები იმ თვითმმართველი ერთეულის ბიუჯეტიდან სადაც არიან რეგისტრირებული (იძულებით გადაადგილებული პირის/დევნილის მიერ მომართვის შემთხვევაში);
• ანგარიშ-ფაქტურა (ინვოისი) ან ამ პროგრამით განსაზღვრული მომსახურების ფინანსური დოკუმენტი;
• ცნობა ჯანმრთელობის მდგომარეობის შესახებ (ფორმა №IV-100/ა);
• ცნობა კერძო დაზღვევით ან/და საყოველთაო ჯანდაცვის ან/და რეფერალური ან/და სხვა სახელმწიფო პროგრამის ფარგლებში დაფინანსების ოდენობის ან დაფინანსებაზე უარის თქმის შესახებ (ასეთის არსებობის შემთხვევაში);
• ხელშეკრულება (შეთანხმება) დავალიანების შესახებ (მოქალაქის სამედიცინო დაწესებულებასთან დავალიანების არსებობის შემთხვევაში);
• აქტი (განმეორებით მომართვის შემთხვევაში), სადაც დასაბუთებული იქნება ოჯახის მძიმე სოციალურ-ეკონომიური მდგომარეობა (აქტს ხელს აწერს შესაბამის ტერიტორიულ ერთეულში მერის წარმომადგენელი);
• სსე აქტის ამონაწერი ან/და ცნობა სოციალური მომსახურების სააგენტოდან შეზღუდული შესაძლებლობის მქონე პირის სტატუსის შესახებ (2.3 პუნქტის „ბ“ ქვეპუნქტის შემთხვევაში);
• ბავშვის უფლებების დაცვისა და მხარდაჭერის განყოფილების წერილი „ბავშვის უფლებების დაცვისა და მხარდაჭერის პროგრამის“ ბენეფიციარის შესახებ;
  • • ცნობა გამოუყენებელი ადმინისტრაციული დაპირების შესახებ (საგარანტიო წერილის გამოუყენებლობის შემთხვევაში);
• დავალიანების არსებობის შემთხვევაში, თუ შეთანხმება ან/და ხელშეკრულება გაფორმებულია ოჯახის წევრთან, ნათესაური კავშირის დამადასტურებელი დოკუმენტი – ქორწინების მოწმობის ასლი (მეუღლეების შემთხვევაში); დაბადების მოწმობის ასლი (მშობლის, შვილის, დედმამიშვილის შემთხვევაში).