1. პროგრამით მოსარგებლე

პროგრამით მოსარგებლენი არიან გარდაბნის მუნიციპალიტეტში რეგისტრირებული (არანაკლებ 6 თვე) ონკოლოგიური დაავადების მქონე პირები (დაავადებების საერთაშორისო კლასიფიკაციის (ICD) კოდით – C, D00-დან D09-ის ჩათვლით), ასევე „ბავშვის უფლებების დაცვისა და მხარდაჭერის პროგრამის“ ბენეფიციარი ონკოლოგიური დაავადების მქონე პირები.

2. მოსარგებლის დაფინანსების ზოგადი წესი

• სამედიცინო დაფინანსების მისაღებად ბენეფიციარი წერილობითი განცხადებით მიმართავს და სრულყოფილ დოკუმენტაციას წარუდგენს გარდაბნის მუნიციპალიტეტის მერს (შემდეგში „მერი“) ან გარდაბნის მუნიციპალიტეტის შესაბამის ადმინისტრაციულ ერთეულში მერის წარმომადგენელს „შემდეგში „მერის წარმომადგენელი“). მიღებული დოკუმენტაცია შესასწავლად იგზავნება მერიის ჯანმრთელობის, სოციალური, ბავშვის უფლებების დაცვისა და მხარდაჭერის სამსახურში (შემდეგში „მერი“). „ბავშვის უფლებების დაცვისა და მხარდაჭერის პროგრამის“ ბენეფიციარის შემთხვევაში, სამსახურს წერილობით მიმართავს გარდაბნის მუნიციპალიტეტის მერიის ჯანმრთელობის, სოციალური, ბავშვის უფლებების დაცვისა და მხარდაჭერის სამსახურის ბავშვის უფლებების დაცვისა და მხარდაჭერის განყოფილება (შემდეგში „ბავშვის უფლებების დაცვისა და მხარდაჭერის განყოფილება“).
• პროგრამა ითვალისწინებს მუნიციპალიტეტის მხრიდან წელიწადში ერთხელ (ოჯახის მდგომარეობის გათვალისწინებით შესაძლებელია ორჯერ):
  • ონკოლოგიური დიაგნოსტიკის დაფინანსებას არაუმეტეს 2000 (ორი ათასი) ლარისა;
  • საოპერაციო, სამკურნალო და სხვა სამედიცინო მომსახურების დაფინანსებას არაუმეტეს 4000 (ოთხი ათასი) ლარისა (კერძო დაზღვევის ან/და საყოველთაო ჯანდაცვის ან/და სხვა სახელმწიფო პროგრამის გათვალისწინებით):
    • ბენეფიციარის მიერ გადასახდელი ღირებულების 80%-ით;
    • სოციალურად დაუცველი (150 000 ქულის ჩათვლით) ბენეფიციარის მიერ გადასახდელი ღირებულების 100%-ით.
  • მედიკამენტების დაფინანსებას (კერძო დაზღვევის ან/და საყოველთაო ჯანდაცვის ან/და სხვა სახელმწიფო პროგრამის გათვალისწინებით), ონკოლოგიური მედიკამენტების შემთხვევაში არაუმეტეს 4000 (ოთხი ათასი) ლარისა, ხოლო არაონკოლოგიური მედიკამენტების შემთხვევაში არაუმეტეს 800 (რვაასი) ლარისა:
    • ბენეფიციარის მიერ გადასახდელი ღირებულების 80%-ით;
    • სოციალურად დაუცველი (150 000 ქულის ჩათვლით) ბენეფიციარის მიერ გადასახდელი ღირებულების 100%-ით.
  • პროგრამის ფარგლებში არ ფინანსდება არჩეული ექიმის ჰონორარი (მათ შორის დავალიანების არსებობის შემთხვევაში) და მოქალაქის მიერ საყოველთაო ჯანდაცვის სახელმწიფო პროგრამით მომსახურებაზე უარის თქმის შემთხვევა.
  • მერიის მიერ გაცემული ადმინისტრაციული დაპირება ძალაშია, თუ მის საფუძველზე მომსახურების გაწევა დაიწყება მისი გაცემიდან 30 (ოცდაათი) კალენდარული დღის ვადაში. ადმინისტრაციული დაპირების ვადის გაგრძელება (გამოუყენებლობის შემთხვევაში) შესაძლებელია ერთჯერადად, 30 (ოცდაათი) კალენდარული დღით. ადმინისტრაციული დაპირების გაცემამდე ჩატარებულ მომსახურებაზე მერია არ იღებს ფინანსურ ვალდებულებას.
  • სამედიცინო დაწესებულების მიერ საგარანტიო წერილის საფუძველზე შესრულებული სამუშაოს დამადასტურებელი დოკუმენტის მერიაში დაფინანსების მოთხოვნით წარდგენის ვადაა პაციენტის გაწერიდან/კვლევის დასრულებიდან 30 (ოცდაათი) კალენდარული დღე. ფარმაცევტული კომპანიის მიერ მიღება-ჩაბარების აქტის მერიაში დაფინანსების მოთხოვნით წარდგენის ვადაა მედიკამენტების გაცემიდან 30 (ოცდაათი) კალენდარული დღე.

3. დახმარების მისაღებად მერიაში წარსადგენი დოკუმენტები

•  განცხადება;
• განმცხადებლის ან/და პაციენტის პირადობის მოწმობის ასლი, არასრულწლოვანის შემთხვევაში დაბადების მოწმობის ასლი;
• იძულებით გადაადგილებული პირის/დევნილის მოწმობის ასლი (იძულებით გადაადგილებული პირის/დევნილის მომართვის შემთხვევაში);
• ცნობა, სადაც მითითებული იქნება, რომ ისინი არ არიან ამ წესით გათვალისწინებული ანალოგიური დახმარების მიმღები იმ ავტონომიური რესპუბლიკის მთავრობიდან/უწყებიდან ან თვითმმართველი ერთეულის ბიუჯეტიდან, სადაც არიან რეგისტრირებული (იძულებით გადაადგილებული პირის/დევნილის მომართვის შემთხვევაში);
• ცნობა ჯანმრთელობის მდგომარეობის შესახებ (ფორმა №IV-100/ა);
• ანგარიშ-ფაქტურა, ინვოისი, კალკულაცია ან სხვა ფინანსური დოკუმენტი;
• ცნობა საყოველთაო ჯანდაცვის სახელმწიფო პროგრამის დაფინანსების ან დაფინანსებაზე უარის მიღების შესახებ (ასეთის არსებობის შემთხვევაში); ასევე საბუთი კერძო დაზღვევის, რეფერალური პროგრამის ან/და სხვა წყაროს მიერ დაფინანსების შესახებ;
• ხელშეკრულება (შეთანხმება) დავალიანების შესახებ (მოქალაქის სამედიცინო დაწესებულებასთან დავალიანების არსებობის შემთხვევაში);
• განყოფილების წერილი „ბავშვის უფლებების დაცვისა და მხარდაჭერის პროგრამის“ ბენეფიციარის შესახებ;
• ცნობა გამოუყენებელი ადმინისტრაციული დაპირების შესახებ (ადმინისტრაციული დაპირების გამოუყენებლობის შემთხვევაში);
• დავალიანების არსებობის შემთხვევაში, თუ შეთანხმება ან/და ხელშეკრულება გაფორმებულია ოჯახის წევრთან, ნათესაური კავშირის დამადასტურებელი დოკუმენტი – ქორწინების მოწმობის ასლი (მეუღლეების შემთხვევაში); დაბადების მოწმობის ასლი (მშობლის, შვილის, და-ძმის შემთხვევაში);
• აქტი (განმეორებით მომართვის შემთხვევაში), სადაც დასაბუთებული იქნება ოჯახის მძიმე სოციალურეკონომიური მდგომარეობა (აქტს ხელს აწერს შესაბამის ტერიტორიულ ერთეულში მერის წარმომადგენელი).